農曆新年系列之3：迷你𣏌子薑汁紅糖年糕

因為未整過年糕，只靠李太媽好簡短嘅講述，呢個年糕有少少打天才波加考記憶，李太儘量諗番十幾廿年前李太媽係點整年糕，但印象都幾模糊，因為通常年糕都係最後至整，有時李太媽係半夜蒸，根本我都已經瞓咗睇唔到，不過以前媽媽話我地大咗，年三十就要過咗半夜十二點至瞓，叫做守歲，為家中父母長輩求福，喻意長壽，點可以忍到眼瞓？多數都係睇TBB嘅賀歲節目，留意下來年生肖運程，聽下賀年歌咁。而家我估TBB嘅節目少咗好多人睇，個個寧願上網都唔睇啦。

講番我呢個年糕，真係一個「創作」，因為摷雪櫃搵紅棗，俾我搵到兩包大大粒𣏌子，於是靈光一閃，不如打D𣏌子啦，有益又甜甜地，因為我個蒸籠較細同矮，唯一一個糕盤啱用嘅已經放咗蘿蔔糕，於是我諗不如整一杯一杯架啦，迷你𣏌子薑汁紅糖年糕就誕生啦。

材料：
糯米粉 13安士（約370克）
紅糖 4安士（113克）
片糖 1-1/3片
𣏌子 適量
薑汁 2茶匙半
水 12安士（355ml）

做法：
1）薑磨好薑汁2茶匙待用，𣏌子用熱水略浸軟。
2）水放煲中，加入紅糖、片糖煮到糖溶，攤凍後加入薑汁待用。

3）糯米粉過篩後，慢慢加入已凍糖水，攪至粉全溶。

4）粽盤掃油，將粉漿過篩倒入，撒入𣏌子，隔水大火蒸約50分鐘至1小時，用竹籤拮入取出冇粉漿黏住就可以取出攤凍。

小心得：
1）想個糕滑冇一粒粒，粉漿要過篩至倒入糕盤中蒸，可以防止有結成一舊舊嘅粉粒。
2）薑汁糖水過篩，因為磨薑會有薑蓉渣，加入盤中前，以匙羹攪一攪，再用一小片廚紙放喺個篩上面，再倒入薑汁，等D薑渣黏在紙上個糖水就會好清好滑。
3）𣏌子喺蒸之前至加入，否則蒸好咗就落唔到。
4）因為𣏌子有甜味，糖份量可以隨口味加減，李太呢個都算甜味適中，但如果你唔鍾意太甜，可以減少片糖同紅糖份量。

後記：
一般坊間見人整或網上寫嘅食譜都會加粘米粉同澄麵，我問過李太媽，老人家話咁多年來都係獨沽一味，李太媽整嘅係片糖年糕，材料只有糯米粉、片糖同水，煮完糖攤凍就加入粉中，攪成粉漿後，蒸個多小時就得，取出後放一粒紅棗喺中間做裝飾，年年食我都覺得好正，加入雞蛋煎係我嘅至愛食法。