又炆豬肉啦!!!

生日前兩日我買咗大塊五花腩，都幾大塊下，有兩三磅，生日前果晚炆定第二晚食。今次整得甜少少，個食譜同之前有D唔同，算係試新味。

材料：
五花腩 1大塊（要肥瘦相間，唔好全瘦）
蒜頭 2瓣
蔥頭 1大粒
片糖 2/3塊
紅糖 1茶匙
肉湯 適量（要浸過肉面）
生抽 2湯匙
老抽 1茶匙
麻油 1湯匙半
魚露 1湯匙
芥末醬 1/2茶匙(Mustard)
月桂葉 1片(Bay leave)

做法：
1）五花腩先出水，撈起肉切成骨牌大少，每塊都要有皮有肥有瘦肉。

2）出水肉湯隔渣留用，不必太多，只要可蓋過肉面就夠。
3）蒜頭拍一拍切細塊，蔥頭去皮切片，燒熱大煲後下油爆香蒜頭同蔥頭。

4）加入片糖，加入少許肉湯，待糖溶後加入五花腩，讓每一塊肉都沾上片糖液。

5）倒入肉湯至蓋過肉面，加入生抽、老抽、麻油、魚露、芥末醬及月桂葉，大火炆完15分鐘，較中火再炆40分鐘就可以收火。

小貼士：
1）其實炆完可以食得架啦，但我多數係隔晚炆定第二晚食。第二日D肥油會結成白色一層喺肉面，用隻匙羹片起再煮返滾成煲肉同汁，到時就冇咁油膩。
2）以前我屋企人會留番D豬油煮菜或撈飯，而家知道唔健康，都會留番，但唔係食，係留番交去recycling center，製成政府車嘅燃油。
3）未食晒嘅炆五花腩肉，到第二日食一定要完全煮滾，但不必煮太耐，因為一般已經係好淋，煮太耐反而會太乾太重味。

後記：李生今晚食咗好多，佢話真係好食，仲以為係李太媽媽煮嘅，哈哈。