第二次嘅排包：迷你版

因為之前整嘅排包對兩個小朋友來講係較為大片，尤其是豬扒妹，因為通常呢隻直接法手搓包到第二日都會較硬，加上呢排天氣實在太凍，麵包放室溫都硬晒，一定要入微波爐或焗爐番熱，咁一拎出嚟對仔女就話好熱太大塊，所以特別改一改，整咗一個迷你版，用嘅料一樣咁多，一樣咁搓唔焗，只係之前個麵糰切成8份，呢次係20份，加埋提子，每一塊排包係正常嘅一半。

材料同詳細做法可以去之前嘅post度睇番（Click入呢度就得），我今次只highlight同上次唔同部份。今次可能做慣咗，搓嘅時間好快，個麵糰發酵好後切開係見到好fluffy，面仲有一D薄膜起泡，質地柔軟但不黏手。發酵完第一次真係大咗好多，未發酵前冇影到相，呢張係發酵完第一次後嘅。

呢張係放氣摺疊後再發酵前影嘅。

二次發酵後個麵糰好大個，好軟身仲有薄膜。

今次切開20份，儘量做到份份差不多大細。

因為加提子，所以卷之前就加入提子再將提子包入中間，揉成一條長麵包條。

續條排入焗盤發酵第三次。

發酵完見到麵包條發大咗。

放入焗爐15分鐘後，因為包面未變金黃色，所以再多焗8分鐘。焗好後係咁嘅。

撕開見到組織好鬆軟，比上次更軟熟更好味。

再撕開一片片可以約略見到提子個影。