Wednesday, January 18, 2012

農曆新年系列之2:傳統賀年油角

其實講整油角,李太好細個已經學識,大約係小學5年級啩,都唔記得好清楚,果陣李太住香港嘅屋村,係七幾年起有獨立廚房廁所果隻,一層樓有四十個單位,果陣鄰居都守望相助,平日都會打開門,行過門口都會寒喧幾句,大家嘅小朋友一齊大,上一樣嘅學校,有D成為好朋友,逢有好嘢食,大家都會分甘同味。由於當時大部份已婚女性都喺屋企一邊湊小朋友,一邊做外發,李太細個就幫李太媽整過絲花,車過睡衣,當時鄰居嘅太太(個個都叫師奶)事無大小,都會大家商量,小至點樣補衫,點樣煮餸,大至小朋友報邊間學校,老公失業等,大家都會講。李太當時年紀細,好多大人嘢我都唔識,李太媽唔會同我講,而家大咗講番,又係另一種體會,好懷念以前果種人情味濃嘅生活,唔似而家「各家自掃門前雪」嘅心態,對於以前嘅情同事,那些年嘅任何嘢都好似令人回味萬分。

講到油角(又叫角仔),李太媽係唔識整,亦都冇興趣整,因為工夫繁多,又花時間,但以前每年農曆新年我地屋企都會有油角,因為以前我媽同隔鄰嘅幾個太太都喜歡玩「交換禮物」,你蒸糕我炸油角,大家整完你拎D俾我,我拎D俾你,冇計較邊樣貴D邊個多D,就係咁樣分工合作,每年幾個家庭嘅賀年食品就樣樣俱全。李太媽每年只蒸糕,年糕、蘿蔔糕、芋頭糕,晚晚開始食晚飯就開始蒸,都要蒸幾晚,有時蒸到半夜三更。

有一年鄰家太太整油角,咁啱要人幫手,李太媽就派李太去,當日都唔知整咗幾多個鐘,只係不停手密密包,鄰居太太壓皮,佢細仔幫手印模,我就負責包,應該包咗幾百隻,原來係幾好玩,我又好有興趣睇住鄰居太太搓皮,當時係用豬油整,D豬油仲要係李太媽用豬肉自己炸俾鄰居太太用嘅,以前總覺得好神奇,個個媽媽都好似萬能咁,一對手又工作,又煮飯洗衫,縫補木工,無咩難倒佢地。而家注重健康,當然唔會用豬油,其實想用都難,今次我以牛油代豬油,炸出嚟冇用豬油咁酥,但出嚟都係脆嘅。




材料:(整到約30至40隻)
低筋粉   13安士(368克)
牛油      2安士(57克)
蛋         2隻
水         少許(約1湯匙)

餡料:
椰絲        3湯匙
白芝麻     3湯匙
糖           3湯匙
焗花生碎  3湯匙

油角皮做法:
1)低筋粉過篩,牛油熱溶加入粉中拌勻。
2)雞蛋略打,拌入粉中拌勻。
3)將粉搓成麵糰,若太乾續少加入水,至可以成糰為止,過程中麵糰若已乾濕合度,可以不必加入水。
4)麵糰放碗中靜置30分鐘。



餡料做法:
1)花生放預熱350度F(176度C)焗爐中焗15分鐘,之後取出以麵棍壓碎去衣,再以刀刴碎。



2)椰絲放易潔鑊中以中火略炒至香,放涼待用。



3)白芝麻以中火炒至香,放涼待用。



4)待椰絲、花生碎、白芝麻涼後,加入糖拌勻成餡料。

包油角程序:
1)將麵糰分成數份壓成薄麵皮,以杯或圓型模印出一塊塊油角皮。





2)將約1茶匙餡料放於油角皮中心位置。
3)皮下至上對摺,由兩邊開始壓實。





4)將整個油角皮邊緣部份以手指壓薄,通常都要來回壓幾次。



5)由一邊至另一邊以姆指由外向入面打側壓入再壓實,希望你明白我講咩,睇相會唔會好D?



6)如是者做晒成個邊緣部份,最後將皮收番去入面就完成。





7)放油入煲內,較至中火,放入油角炸至兩面都成為金黃色,撈起以吸油紙吸乾油份。





小心得:
1)做皮時未必一定要加水,要睇個皮係乾定濕,如果已足夠和成麵糰就唔駛加。
2)炒椰絲時唔可以大火,因為椰絲好易燶,如果鍾意食較香口嘅,就不妨炒至變成微黃色。



3)怕焗花生麻煩,可買現成嘅roasted peanuts再壓碎。
4)將油角皮以手指略為壓薄,做成少少兜型,可以方便包餡料,唔咁做都不大問題。
5)油角皮越薄,炸嘅時間就越短,但炸嘅過程中亦容易穿。
6)炸油角時建議以一個網罩或有孔湯殼放入油角先炸,炸至一面變成白色就可以反轉離罩/殼,每次唔好同事放太多(我鍾意用個細湯煲炸,一來所需油份會少D,二來又唔會咁易彈晒D油出嚟),方便可以每一隻去經常反轉同炸得均勻。





7)天氣凍油角放過夜就會油咗唔脆,可以焗爐較350度F(175度C)略為焗一焗就會脆番。儲存就要放入存氣盒內,可以放到一兩個星期。

4 comments:

  1. 稔著過2天如果有時間才玩~您用低粉~牛油應該幾香~一般人用中粉~試下兩種~椰絲買不到~外面下冰雪很危險~明日才出外買料
    [版主回覆01/23/2012 15:53:02]最衰就係我住得唔近Walmart,Costco又冇麵粉賣,反而喺Safeway見到有高粉賣,低粉就要去Whole Foods至有,當然唔會平,不過整麵包就冇得揀,低粉都可以中粉加粟粉,高粉唔得。
    [Maggie Kitchen回覆01/23/2012 11:51:32]買低粉去WAL-MART很平~一見有就買幾盒~今日我用中粉+白油+菜油~不能成塊全部丟了
    [版主回覆01/22/2012 14:31:55]我都會中粉加粟粉當低粉用,因為唔係度度買到,但整麵包就冇得揀,貴都要買高粉。我地呢度最近都好凍,朝早得三十幾四十度。

    ReplyDelete
  2. 好朋友早晨呀!恭喜恭喜,而家已經正式踏入大年初一喇! wtm246祝你龍年★大吉大利★龍馬精神★心想事成★笑口常開★!
    [版主回覆01/24/2012 08:14:32]已經年初一啦,正式拜過年先:龍年龍行天下,龍馬精神,龍飛鳳舞~
    [版主回覆01/23/2012 15:55:22]嘻嘻,我而家仲係年廿九,就要瞓啦,祝龍年事事如意,身體健康,心想事成。

    ReplyDelete
  3. Pandora 香傭講法文January 23, 2012 at 1:49 PM

    very 清楚, many thanks
    [版主回覆01/24/2012 08:16:11]希望咁多口水冇浸親人啦。祝Pandora一家龍年身體健康,心想事成,生活愉快。

    ReplyDelete
  4. www.裝修公司.comJanuary 24, 2012 at 10:17 AM

    值此新年之際,祝您:
    大財、小財、意外財,財源滾滾;
    親情、友情、愛情,情情如意;
    官運、財運、桃花運,運運亨通;
    愛人、親人、友人,人人平安!
    [版主回覆01/25/2012 02:31:03]謝謝,祝龍年生意興隆,長做長有。

    ReplyDelete