Tuesday, January 17, 2012

排排坐,港式排包 HK Style Egg & Butter Bread

排包係我喜歡嘅港式麵包之一,最鍾意佢可以一片片撕出嚟,甜甜地個樣又幾靚,不過以前屋企窮小朋友多,多數都係買一大條嘅生命麵包,如果買手工麵包真係好好錢都唔夠食得飽。今次整係俾仔仔帶番學校食,原來已經有粟米雞蓉湯俾仔仔做午餐,但又好似唔係幾夠飽,尤其是第二日仔仔有體育堂,通常都會肚餓D,李生叫我整啦,我想下,都係嘅,多塊麵包頂肚D。






材料:
高筋粉 17安士(476克)
4安士(112克)
酵母 1/4安士(7克)
牛油 2安士(56克)
暖水 6安士(188ml)
1隻(留少許蛋黃作掃包面用)
牛奶 2安士(63ml)

做法:
1)酵母以一半糖及部份暖水先浸10分鐘。
2)粉過篩,加入餘下一半糖、牛油、蛋拌勻。
3)倒牛奶入粉中,再把酵母水倒入拌勻。
4)續少加入暖水,把麵粉搓成麵團,水不定要全部加入,只要足夠就好。
5)將粉糰取出放枱上,以雙手搓至光滑不見筋,期間若發現麵糰太乾可以加入水,太濕則加粉,搓至光滑有彈性但不黏手。



6)麵糰放碗中,蓋上保鮮紙,靜置30分鐘。



7)以手指輕輕插入麵糰中放氣,取出略摺幾次,再放碗中,蓋上保鮮紙再發酵30分鐘。



8)取出麵糰切成8等份,每份由兩側向入面各摺一次,以手指將麵糰滾成圓形長條。









9)焗盤掃油,焗爐預熱400度F(200度C)。
10)將滾成圓條狀的麵糰拍埋,排入焗盤中,再發酵多30分鐘。



11)在包面掃上少許蛋液,放入焗爐中焗15至20分鐘,至包面呈金黃色,包內又熟透為止。





小貼士:
1)麵糰可分割成更多份,大前提係盡量每一份都相等份量,做出嚟嘅排包大細厚薄會平均D。
2)如果搓揉時間合適,麵包可以一片片撕出。



3)想做得靚,最好係唔好太大塊一片。

後記:
哥哥今日返學真係食晒成份麵包,雖然塊麵包對於大人嚟講唔算好大,但一個小朋友真係未必食得晒,我估係因為今日仔仔體育堂踢足球,所以佢好肚餓,再多都睇怕可以食得晒。

6 comments:

  1. 好劲呀!你乜都识整既?!
    [版主回覆01/25/2012 13:05:59]收到啦師傅,等我睇清楚一定會試下,謝謝你。
    [周公 Kai回覆01/25/2012 12:27:09]新方法只發酵一次 搓好包後即做型 口鬆身 最口濕發 便好 配方已 E給妳 !
    [版主回覆01/21/2012 02:17:05]當然唔係啦,我都係試下試下,整麵包我係初哥,不過我覺得整得到就同其他人分享下,原來手搓都唔難架,當然有麵包機就更容易,係要時間耐D,因為發酵幾次。

    ReplyDelete
  2. Hello 很想試吓!請問芝麻醬點整和有何用法?多謝師傅指點!
    [版主回覆05/21/2012 13:22:49]咦,你係問我定我師傅呀?芝麻醬你係想講中式定日式果種?芝麻醬好呢工夫,我知道有兩種做法。一種係將芝麻白鑊炒香至黃,加入攪拌機打至成醬,大大話話打15至20分鐘。另一種係雞湯加芝麻油醬油粟粉煮成醬汁,都花時間,但比就咁打芝麻慳工夫。芝麻醬都係一般拌冷麵或手撕雞等冷盤多。

    ReplyDelete
  3. 啊!原來您還有師傅!?嘩!
    身在他鄉很難食到港式嘅食物,每樣都想整來試吓!但我喺入厨新手,靠師傅指導!其實每個煮得好食嘅都喺我師傅.
    市面有很多種芝蔴醬,有何用?有日本出.有四川.有廣式等.有乜分別?我見食譜上有用喺凉麵.冷盆.或鷄絲等.他們多數幾種料Mix一齊.請問有無港式做法和用喺邊度?
    [版主回覆05/22/2012 06:02:27]唔係正式師傅,係網上識,佢耐不耐指點下我咁。你都唔喺香港住?人在他鄉懷念港式食品十分正常,我呢邊唔係冇港式中式嘢食,只係未必好食又貴,所以至有興緻自己整,我都係去搵下書問下人再做下實驗,所以我所整嘅唔一定正宗。

    至於麻醬,我多數用嚟沾冷麵或粉皮食,四川涼麵係麻同辣,就咁麻醬唔夠,要加辣椒同辣油,港式食法都係手撕雞沙律,我整過一個中式手撕雞沙律,不過冇加麻醬,用咗生抽麻油同醋,如果用麻醬就加少少醋雞湯加糖煮成醬撈勻。

    ReplyDelete
  4. Hi ,hi 特別喺小朋友帶Lunch,都不知道做乜東東俾佢哋帶返學
    [版主回覆05/22/2012 06:46:23]你小朋友有偏食嗎?我果兩個唔多食肉,醫生話冇問題,由得佢地,肯食瓜菜生果牛奶芝士就OK。我仔帶午餐最鍾意係pizza 同hotdog,但呢兩樣唔可以成日食,尤其是腸仔,色素調味防腐劑等等,我仔有濕疹,呢D都要盡量唔食,不過我仔偏偏最鍾意,而家唯有自己整pizza俾佢食,hotdog就耐不耐一次,仲要千挑萬選鹽同糖都少嘅至買嚟食。有時見到個仔午餐盒只係食咗少少,都唔明點可以成日食咁少嘢又好似電兔咁周圍走。

    ReplyDelete
  5. 多謝回覆.好有同感.呢到的港式食品很少且貴,多數中國入口.想食要揸車好耐用找尋

    ReplyDelete
  6. 小朋友無偏食,但每個口味唔同,大仔二仔喜歡食肉,細女喜食疏果.我有買mini pizza和炒飯放入保温壺內,但到午餐時間pizza濕了,炒飲佢哋又話打開蓋有陣味.每人口味不同,做每種都是但有一個唔鐘意食,好麻煩,每朝早起又要煮早餐又要pack lunch.隔晚整定又難食.您有否此煩惱?
    [版主回覆05/23/2012 00:33:22]我都有煩惱,個仔好咀尖,有時個飯盒只係食咁1/4,snack生果又未必食,我都唔知佢點頂到咁耐,問佢點解唔食,佢一係話唔鍾意,一係話唔好食,其實係掛住玩,不過好多時仔仔個午餐盒都係老公整,我耐不時會整D得意嘢等我仔食多D。個女暫時唔駛帶飯盒,不過去到8月都要煩埋佢果份,個女喺而家學校食好OK,但8月開學去新學校,冇人再會篤住佢食,唔知到時又會點。最奇怪係我個仔都算大食,冇理由喺學校可以食咁少,有時都好苦惱要整D咩佢至會食晒,個飯盒其實都唔算好大個。

    ReplyDelete