李太手作仔之1：紐扣頭珠

李太手作仔之1：紐扣頭珠

做呢個勾起我少少童年回憶，話說以前小學中學校規都好嚴，

街買嘅頭珠一般都唔合格，因為顏色只可以係黑色、啡色或藍色，

所以街買到幾靚都唔可以紥返學，於是豬扒妹婆婆就自製頭珠，

幫李太同糖糖姨扮靚，而且以前我同妹妹糖糖都好怕用普通橡皮圈，

實會扯甩頭髮，頭珠果種就唔怕，所以婆婆要幫兩個女特別整。

以前豬扒妹婆婆係買一種黑色橡皮筋，多數用嚟做頭珠果隻，

不過係黑色，去D裁縫舖係一碼碼買，其實好少都夠用。

我就只係買咗D得意紐扣，用屋企現成嘅橡皮圈嚟做，好簡單架咋。

首先材料係紐扣，有腳或無腳都得。另外，就係橡皮圈，我有三隻現成嘅喺屋企，

再需要一隻髮夾，要平果隻，唔要夾身扭紋曲起果隻bobby pin，稍後你會知點解。

嗱，呢隻係普通紐扣，無腳，即係紐孔係前面睇到。

呢款係所謂有腳嘅紐扣，個紐孔係打側先見到。

兩種都可以做，只係做嘅方法有少少唔同。

首先講冇腳嘅，呢種紐扣係較為平面，我呢個係兩孔嘅，四孔都用得，但其實只要兩個孔就做到，四孔反而唔係幾好睇。

拎起條橡皮圈，用個髮夾幫手，將橡皮圈一方穿過其中一個紐孔，

另一方又穿過另一個孔，穿時要橡皮圈兩頭在紐扣底部，

如果唔係，整起會反轉咗。

之後就將其中一個橡皮圈穿過另一個，好似打個活結咁，

整理好綁實粒紐就完成。呢個花花靚唔靚呀？

冇腳果隻仲容易，因為只有一個紐孔，只要將橡皮圈穿過，

再由其中一邊穿過另一邊，拉緊就完成。

你睇個星星幾可愛。

最後一個係多個紐扣加入一條橡皮圈上，由於條橡皮圈較粗，

徒手好難將條橡皮圈穿過，我就用一隻黑髮夾，好似一枝針咁穿過紐孔，

連帶將D紐扣都穿埋過去。

我初初想整四粒星星，但整出嚟炒埋一齊唔好靚，

所以最後用咗三粒星星，做咗呢一個，

綁上頭髮時係咁樣嘅。

今晚幫豬扒妹整咗一對花花、一對星星，聽朝唔知佢開唔開心呢？

佢原本想幫手整架，但因為佢瞓咗，我就自己整啦。