三藩市巴士站之2

三藩市巴士站之2

今朝講過三藩市呢度嘅巴士站，因為今日老公要去整牙，

放工我都係自己搭巴士，見到最新嘅環保巴士站。

都幾靚吓，又乾淨新潮D，採光度一流，我八卦行埋去睇吓，

有我之前講嘅盲人訊號機，可以收聽行車班次資料，

另外，原來呢隻環保巴士站做成波浪型站頂，可以光猛D之餘，

仲可以收集太陽能，用番落個站嘅照明設備度，慳40％電力；

多數仲係長D多座位D，暫時我都係見到D有咋，或者慢慢會轉晒。

講吓D巴士，三藩市有一部份車係要靠電線供應電力行車，好似香港嘅電車咁。

呢架就係啦，不過因為後面棟樓都係白色，兩條電線桿痴晒地，

睇得麻麻地，下次影到再上嚟換過張相。

巴士車廂前面右邊通常都有個俾有輪椅嘅乘客用，平日冇傷殘人士時，

就可以拍落嚟做普通座位，有乘客坐輪椅，個司機會放果昇降台，

乘客上咗車之後，泊好架輪椅就用安全帶綁好，唔會碌嚟碌去啦。

車上面都有個電子版，一路顯示下一站嘅街名，仲會有廣播，

就算唔識聽或者聽唔清楚都可以睇到幾時落車。

不過呢邊交通費都幾貴，單程個半鐘係美金$2，有月票可以成個月任搭，

不過而家月票都越嚟越貴，成人60蚊一張，8月又話加價，

但如果係喺City裏面返工，泊車好煩，尤其是Downtown，

一係就泊車房，一日8個鐘可以係$18至$30，入咪錶搵街位更難，

呢度又話黃界，果邊又話最多泊半個鐘，所以免得過去Downtown都係搭車好D。