檸汁梳乎厘 Lemon Souffle

檸汁梳乎厘 Lemon Souffle

原本想出關於周末去Shopping同去公園玩嘅網誌先，但昨日喺FB出咗兩張相，
李太D朋友問我囉食譜，為咗唔想打兩次，所以出咗Lemon Souffle嘅做法先。

材料：

檸檬汁（我用鮮榨嘅）60 ml
水　　　　　　　　　65 ml

白糖（我用紅糖）       三至四大湯匙
栗粉（我用咗豆粉）   兩茶匙
牛油                           1/8 oz（約兩茶匙半）
蛋白（分開蛋黃不用）5隻
糖粉                            適量

做法：
1）水65ml加檸檬汁放入小鍋中煮，加入兩匙半紅糖煮至溶。

2）豆粉以少許水浴解，待鍋中紅糖水滾之後續少加入，當加入豆粉水之後會即時變濃，不必等溶液再滾，只要完全溶合之後就收火，放一邊待涼。

3）焗爐開350度。4個Ramekin杯，以牛油塗抹杯底及杯邊，最易嘅方法係放牛油入微波爐叮10-15秒至溶化，倒少許牛油入杯中，多餘嘅牛油倒出，喜歡的話可以待牛油同杯涼了之後，灑下幼砂糖，讓砂糖沾滿杯邊，待用。

4）5隻雞蛋只要蛋白，不可有些微蛋黃，放入一隻完全乾爽嘅大盤中，一定千萬唔可以有水，否則就打唔起。

5）加入少許糖（約一茶匙半），以打蛋器打發蛋白，如果有攪拌機就最好，我打完D蛋後，隻右手臂完全好似癈咗成晚，今朝先叫做冇咁痛。

6）OK，蛋白打到企身，只要好似相中打側個盤唔會即時跌落嚟就得啦，唔駛好似表演咁反轉唔跌，千萬唔好打發過份，否則蛋白會分離。

7）打好蛋白之後，即時分三四次加入糖漿，加入時用個spatula以fold入嘅方法拌勻，不要左攪右攪，否則做出嚟就唔滑唔勻。

8）倒入4個rumekins中，（仔仔幫手做咗一半）放入個baking tray中，tray加水入焗爐。

9）350度焗15分鐘，或至蛋漿升高過杯約一吋。

10）之後在面上灑上糖霜，呢個部份仔仔有幫手，

當然D糖係天一半地一半，不過唔緊要啦，仔仔開心參與就夠，清潔工夫都係少事。

雖然李生同李豬扒小姐對呢個Lemon souffle麻麻地鍾意，因為略帶酸，

不過有李大少欣賞，見佢食完四份一話夠，以為佢唔鍾意食，

原來佢話："I want to save it later, for tomorrow"，唔想而家食晒，真窩心。