李太就快退休

今日哄咗囡囡同囝囝去瞓晏，諗住可以出街去買電

（係呀，昨日去玩完太攰冇買到，今日見到Walgreens有減價同買一送一，

拿拿林要去，而且好唔方便，昨日已經冇得點影相，因為個Videocam係新嘅，

未係好識點up上個電腦度），臨出門口，諗住瞄吓兩個瞓咗未，

順便要入去攞條褲換，點知係就係瞓，不過係李生，唔係李小姐同李大少啫。

失望之餘，見到個奇景：豬扒妹巴喺自己張床度玩頭髮，

睇真D，佢係玩緊twist，即係扭紋辮，兩條頭髮交叉扭埋一齊，

都幾見得人架，我問佢做咩，佢話佢識紥辮辮，仲示範咗一次我睇，

我有錄低咗Video，等我攪掂部Videocam之後再up上嚟，而家睇住相先。

佢真係有紋有路，只係唔識綁橡皮筋，佢搵咗髮夾夾住條辮，

不過就夾唔準，所以最後散咗，我估好快我呢個紥辮媽咪就要退休啦。

好唔捨得幫囡囡紥辮呢種親子活動，如果囡囡肯，李太仲係手腳靈活嘅，

我想喺佢結婚時幫佢整頭髮，之後幫孫女紥辮。