San Mateo Coyote Point Park Picnic - 1

Bay Area Families Gathering

話說上星期六約咗成班媽咪去San Mateo Coyote Point Park picnic，

總共13個家庭，大人差不多30人，小朋友加BB十幾個，一早有個媽咪去攞枱，

原來即使俾錢book咗都要一早去claim，多謝晒趙生趙太10點就去到，

仲set埋tent去遮住D食物，同有個遮陰位俾小朋友去食嘢。

之前都知有燒烤爐可以燒嘢食，但因為大家都有不同schedules，

好難會同一時間到，所以為方便，我地今次係potluck picnic。

我地有媽咪整加州卷、海帶沙律、紅豆沙、西米露、曲奇、生果、熱狗等，

我地就帶咗雞翼雞槌同蛋糕。

去到個遊樂場好大好靚好乾淨，我地去果個係Magic Mountain Area, 

小朋友玩得好開心，因為個playground structures係超級大，有個幾層樓高嘅滑梯，

初初豬扒妹唔敢上去，之後有個大一歲嘅K哥哥同佢拖住手去玩，

玩完一次又一次，每次未見人已經聽到佢嘅大笑聲，

落到嚟佢就講：Mommy，one more time please! 足足講咗五六次，

到真係要走，豬扒妹同K哥哥都好唔捨得。

果日我地係十一點前去到，其他媽咪陸續到，

有D仲帶埋老人家去，非常熱鬧，因為大人多過小朋友，

我地呢班媽咪可以雞啄唔斷咁傾咗幾個鐘，湊仔經啦，移民生活啦，

天南地北咩都傾一餐，咁就消磨咗五個鐘，我都好佩服我地自己，

大人追住小朋友玩，最正係有好多爹地媽咪公公婆婆幫手, 

keep an eye 去睇住D小朋友。李太掛住傾計，回程喺車上先覺肚餓，

因為我唔係食咗好多嘢，又要睇住我果兩隻馬騮仔女。

除咗個遊樂場，趙生趙太真係好好安排，有足球有吹泡泡，

Mrs. G就帶咗紙鳶，豬扒妹同佢個靚靚囡囡R拖住手周圍走，

豬扒妹好鍾意同靚靚姐姐玩，尤其是長頭髮嘅，

多謝R妹妹幫我睇女，佢好照顧豬扒妹，Thank you。

最衰我個相機果日冇電，冇得影相，videocam影嘅snapshots又唔係好好，

我要睇下有冇三幾張可以貼上嚟俾大家睇下，

可以俾條link大家去San Mateo Recreation Department個網度，

有幾張遊樂場嘅相，睇到少少設施同環境。

下篇再續講我整雞翼雞槌。