Rossi Park Children Player

其實呢篇應該係上個星期出嘅，因為我地係7個17日去嘅。但有其他嘢想講，

又想保持我開blog嘅原意：編織髮髻辮，另外又想有多少少相

（上星期好似影得唔夠多），所以遲遲都未出。

其實近呢一個月，每個星期都會約埋兩個仔仔嘅同學去公園玩，

佢地係一對孖女，同豬扒妹、哥哥都好玩得埋，因為佢地媽咪都係由香港嚟，

而爸爸都係ABC，我地兩對夫婦都好傾得埋，多數都係老公揸車送我地去公園，

放低我地之後佢會返屋企洗吓衫、整第日午餐、或者自己一個人嘆吓，

我就同孖女媽咪兩個女人睇住4個小朋友玩，我地會帶定飲品同小食，

等佢地玩到差不多一個鐘就休息吓，通常玩個半鐘就會返屋企架啦。

今次我地去Rossi Park Children Playground，呢個park好大，有藍球場、網球場、

大草地（好多足球班星期六、日喺呢度上堂）、泳池、dog park，

當然有一個都算幾大嘅兒童公園，有基本嘅韆鞦、滑梯，

仲有分開兩個sections俾toddlers同大小朋友，另外有monkey bars同climbing structures...

豬扒妹、哥哥同孖女最鍾意坐喺呢間屋度玩同食snack。

呢個係俾大小朋友嘅滑梯，條樓梯都好直吓，太細個係爬唔到上去架，

而且都好高架，成年前第一次嚟，豬扒妹未識上去玩，而家唔同啦。

佢兩兄妹會輪住上，之後要等埋一齊滑落嚟。

豬扒妹好鍾意玩呢個氹氹轉，但哥哥就好驚，所以多數係妹妹坐哥哥轉。

呢個係我講果個大climbing structure，都好高吓，我粗略估計都應該有成二十呎，

暫時哥哥都係可以去到一半多D，豬扒妹未夠腳長，爬到咁上下就坐喺d繩度。

呢一個係俾toddlers玩嘅一個structure，有木橋有屋仔有滑梯，另一面有monkey bars。

其實monkey bars，佢地兩兄妹都好差，仔仔兩下就跌落地，

豬扒妹基本係未識單手抓住，所以係去唔到第二條嘅。

呢幾張係今日影嘅，所以豬扒妹嘅衫同頭髮都唔同咗，天氣今日都熱過上星期。

公園中間有棵樹，有好多小朋友都鍾意爬上去玩，都唔算好高。

今日好熱好晒，間屋仔又俾一個女人加個阿婆霸咗嚟坐，

4個小朋友係坐喺樹下面食snack。

呢個角度見到個公園仲有其他structures俾小朋友玩，另外有少量野餐檯，

呢排都見到有人嚟開生日會，今日仲有兩班，好似租檯盛惠美金$50。