李太新玩具之4

李太新玩具之4

李太之前訂嘅玩具都嚟得七七八八，昨日又收埋D絲帶、妞扣同花仔等，

豬扒妹已經好興奮，因為佢知有一堆絲帶同花仔，會用嚟整髮夾俾佢，

連續兩日都問我，想攞嚟睇，但食完飯之後就唔記得咗，

所以暫時當事人仲未見過以下呢一堆「玩具」。

首先係50個鱷魚夾，我收到後硬係覺得好似好細咁，但度吓豬扒妹而家用緊嘅，

又完全係同一個size，手工就麻麻地，有D上下位置唔正，要我較過，

但咁嘅價錢我都唔可以要求好高，OK啦。

之後係絲帶，呢度有20碼淨色嘅，一共有20隻色。

我再買咗50碼有圖案同淨色嘅，一於mix and match。

再嚟係花仔同紐扣，我訂D紐，可以用嚟整髮夾之餘，仲可以整頭珠。

絲帶花仔有50「粒」，花花紐有20個，星星紐就有50個，有排慢慢玩。

另外，因為豬扒妹鍾意蝴蝶，所以我見到D立體蝴蝶，我都入咗D貨，

有七隻顏色：紅、黃、綠、藍、紫、粉紅、玫瑰紅，希望會整到靚靚髮夾。

而家只要我訂果枝熱溶膠槍到埋就可以開工。